Monday, June 17, 2013

෴නීතිය සහ මනුෂ්‍යත්ව එකම අම්මාගේ දරුවන් දෙදෙනෙකු වැනිය෴

            
යහපත් පැවැත්මක් උදෙසා නීතිය ක්‍රියාත්මක කළ යුතුය. විනය රැකෙනුයේ එවිටය. නොසන්සුන් වු මිනිසෙකු හික්මුණු පුද්ගලයෙකු බවට පත් කිරීමට නීතියට හැකිය.  එහෙත් මනුෂ්‍යත්වයද නීතිය පිටුපසින් පැමිණිය යුතුය.

සෑබැ මිනිසත්කම 1 සම්පාදනය :     භග්ගමුවේ සිරි රතනාලංකාර ස්ථිවිර 


මෙම පොත සම්පාදනය කළ උන්වහන්සේට බොහෝමත් පිං. අද ඇස ගැටෙන සෑම දේම විසිතුරු සරුංගල වැනිය. මම ලියනවාට වඩා උන්වහන්සේ ගේ සිතුවිලි ටික අකුරු කරමි.


සම්පාදකගේ සටහන: ඇතැම් විට මෙහි සඳහන් දෙය ඔබට අරුචි විය හැකිය. එහෙත් කළබල නොවී සැනසිල්ලේ කියවා බැලුවොත් කිසියම් තේරුමක් - අදහසක් වැටහී යාවි. මට උවමනා වුයේ මේ අපේ සමාජය ගමන් ගන්නා භයානක පරිහානිය  - විනාශය පිළිබඳව තොරතුරු ටිකක් දැක්විමටයි. එය සාර්ථක වීද - නොවීද මම නොදනමි. ගුණධර්මයන් මුළුමනින්ම නාය යෑමට ගොදුරු වී ඇත. ඒවා නැවැත්වීමට යන්න දරන්නෝ හෝ දකින්නෝ නැත්තාහ.


ආදර්ශමත් කථාවක් මෙන්ම සිත කම්පනයට පත් කරවන වර්තමාන ලාංකීය ජන ජිවිතයේ තවත් එක් අඳුරු පැතිකඩකි. මේ මොහොත වන විටත් කී දෙනෙකු නම් කුස ගින්නේ වකුටු වි නිදි බරව කඳුළු සලනාව ඇත්ද?

මේ සමාජය ගමන් කරන්නේ කුමන ඉලක්කයක් කරාද? යන්න වටහා ගන්නට නුපුළුවන. අවවාද දිය යුත්තෝ මර නින්දේ පසුවෙති. ඒ නිසා නොඇසෙති. නොපෙනෙති. හිමියකු - වගකිව යුත්තකු නැති අසරණ ජාතියක් කෙසේ නම් කෙළින් සිටීවිද? රුපියල් - සත සඳහාම සිතන පතන, වැඩිහිටි ගුණවතුන් නොහඳුන්නාවු  ජාතියකින් බලාපොරොත්තු විය හැක්කේ මොනවාද? ලිවිය යුතු දේ රැසකි. නමුත් මුද්‍රණ වියදම් වැඩිවීම ඔබට මහ බරක් වන බැවින් කෙටි කෙළෙමි.  


පිටුව :49


පාලන නීතය හා යුතුකම

      
      කිසියම් පවුලක සමාජයක හෝ දේශයක යහපත් පැවැත්මට හේතු වන්නා වු පිළිගත් සම්මත (නීතිය) නම් වෙයි. එය හුදෙක් සමාජ සදාචාර පැවැත්ම සඳහා විනය ගරුකභාවය හා උභයලෝකාර්ථ සංසිද්ධිය පිණිස හේතු වන්නේය. මෙම සම්මත (නීතිය) කඩන්නවුන්ට දඬුවම් නියම කෙරෙන්නේද, කරවන්නේද නැවතත් ඔවුන් වැඩක් ඇතියවුන් ලෙස සමාජ වගකීමක් දරන්නන් ලෙස හික්මවා ගැනීමටය. එසේ නැතිව සමාජ දුෂකයන් ජාතිභ්‍රෂ්ටයන් සේ සලකා විනාශ කරලීමට නම් නොවේ. මෙහිදී සමාජ චාරිත්‍ර වාරිත්‍ර මෙන්ම රාෂ්ට්‍රපාලන නීතියත් එකට ගමන් කළ යුතු වෙයි. සමහර විට මෙකී සමාජ සම්මතය හා පාලන නීතිය එකම ලී දණ්ඩක දෙකොන සේ එක් නොවන අතර තවත් තැනකදී මනුෂ්‍යත්වය මත එකට එක් වෙයි. තවත් විදියකින් කියතොත් රෙද්දේ ගාණට මිනිසා කපනවද? මිනිසාගේ ගාණට රෙද්ද කපනවද? සිතතොත් මිනිසාත් රෙද්දත් රැකගෙන දෙකෙන්ම ප්‍රයෝජන ගන්නවාදැයි විවේකව සිතා මතා තීරණයක් ගැනීම මැනවි. මෙහිදී කෙළින්ම බුද්ධියට ඇමතිය යුතුය. නොඑසේ වුවහොත් ප්‍රජා විනාශය ආරම්භ වන්නේ එතැනිනි.

     
   සෑම සමාජයකම හෝ පවුලකම දියුණුව රැදී පවත්නේ ඔවුන්ගේ ක්‍රියා පද්ධතිය මතය. ඒ සඳහා උදවුවන්නේ දින චරියාවයි. කාල සටහනයි. එහි පාන්දර අවදි විමේ පටන් නැවත රැය නින්දට යනතුරුම සටහන් තිබිය යුතුය. මෙහිදී අවදිවීම, ආහාර ගැනීම, සිරුරුකිස, කාර්මාන්තයෙහි යෙදීම, පිරිස් පාලනය, නින්දට යෑම යන කරුණු ප්‍රධාන වන්නේය. ඉතිරි සියල්ල සුදුසු පරිදි ඉහත කී කොටස් තුළට ඇතුළු කිරීම මැනවි. ගොවිපළේ හෝ කර්මාන්තායතනයේ වැඩ කටයුතු පිළිබඳව සකස් කර ගත්තා වු කාලසටහන අනුව මේ මේ දෙය කළයුතුයැයි සටහන් විය යුතුය. එසේ පාලනයක් කරගන්නට නොහැකි වුවහොත් ඔබ ඉතා අසරණ බවට දුඛිත තත්වයට ගොදුරු වන්නෙහිය. හකුරු කතත් ගුරුන් ගෙන් අසා කීවත් මෙන් බුද්ධිමත්ව තීරණ ගතයුතු අතර ගැටලුවක දී ඒ ගැන දන්නා පිරිසකගෙන් උපදෙස් ලබා ගැනීම අගනේය. හැම මනුෂ්‍යකුටම ඇතිවන දුක සැප සතුට, වේදනාව පැවසීමට අදාළ කල්‍යාණ මිත්‍රයකුවත් සිටිය යුතුය. ඔහු කිසිවිටක ඔබ අත් නොහැර සෙවණැල්ලක් සේ ළඟ සිටිනු ඇත. මේ උතුම් මිතුරා නිවන් දැකීම දක්වා පිහිට වෙයි. මෙකී මිතුරා පියා, මව, බිරිඳ හෝ ලේහුරු නෑයකු, ආගමික පුජ්‍යයකු නැත්නම් විජාතිකයකු වන්නට පිළිවන. කුණු කසළ ගොඩක තිබුණද මැණික් අගනේමය. වටනේමය. කළ යුත්තේ විවේක බුද්ධියෙන්, ප්‍රයෝජන ගැනීමට හුරුකිරීමයි. (මෙද කියවන්න)

     
ඔවුහු කළුතර පෙදෙසේ පුංචි පැල්පතක දිවි ගෙවන අසරණ පවුලකි. වසර තුනක සුරතලෙක්ද සිටියි. නියම රැකියාවක් නැත්ද අසල රබර් වත්තක යම් යම් දේ කොට ලත් මුදලින් දිවි ගැට ගසා ගනිති. පෙබරවාරි මාසය ලැබුවේය. දැන් රබර් වත්තේ වැඩ නැත. සතියක් ගෙවිණි. පාන් කීපයකින් දිවි ගෙවා ගත්හ. පුංචි පැටියාට කුසගිනි ඉවසිය නොහැක.“අම්මේ!බඩගිනියි. කියමින් නොනැවති අඬයි. විකිණිය හැකි කිසිවක් මේ පැල්පතේ ඇත්තේ ම නැත. ගෙය පුරා ඇවිස්සුවද පයිසයක්වත් සොයා ගන්නට නොහැකි විය. දහ අතේ කල්පනා කළ බිරින්දෑ සිය හිමියාට


මේ ඇහුනද? පොඩි එකා බඩගින්නේ අඬනවා.දෙන්න කිසිම දෙයක් නෑ.උදේ කැඳ ටිකක් දුන්නා.දැන් කොත්තමල්ලි ටිකක් තම්බා පෙව්වා. ඒත් අඬනවා. අන්න අර පොඩි මහත්තයාගේ වත්ත පල්ලෙහා කොස් ගහක පාතම ලොකු ගෙඩි තියෙනවා දැක්කා. ගිහින් මහත්තයට කියලා ගෙඩියක් ඉල්ලාගෙන එන්න. යි පැවසුවාය. එය පිළිගෙන මිදුලට බැස්ස විට


  “මේ මේ නොකියා එහෙම කඩාගෙන එන්න එපා. යි බිරිඳ  කීවාය. එයත් හිතේ තබාගෙන වත්තේ ගේට්ටුවෙන් ඇතුළු වන විටම අයිතිකාර මහත්තයා මොටෝරියේ නැගී පිට වී ගියේය. නැවතී කල්පනා කළ ඔහු

  
 දැන් ආපු එකේ කොස් ගෙඩියක් කඩාගෙන ම යනවා හෙට උදේ මහත්තයට කියනවා යි තීරණයට බැස ගසක තිබු කොස් ගෙඩියක් කඩාගෙන ගොස් බිරිඳට දුන්නේය. එය අතට ගත් ඕ තොමෝ විස්තරය කීවේය. අනේ මන්දා මේවා ළමයින්ට කවලා අපායේ යයිද මන්දා කියා දිග සුසුමක් හෙළා ඉක්මනින් තම්බා ලුණු ටිකක් ඉස කන්නට දී දරුවා නිදි කළාය. පසුදින උදේ කොස් ගෙඩියේ විත්තිය කීම සඳහා යෑමට මිදුලට බැස්සා පමණි. ඔහු ඉදිරියේ පෙනී සිටි පොලිස් නිළධාරියකු දැක හොදටම බය විය.

පොලිස් නිලදරුවා:   ජේමිස් කියන්නේ කවුද?


ජේමිස් :          මමයි රාලහාමි,ඇයි ?රාලහාමි


පොලිස් නිලදරුවා තමාට විරුද්ධව කොස් හොරකමක් ගැන පැමිණිල්ලක් තියෙනවා.එනවා යන්න පොලිසි යන්න.


ජේමිස් :අනේ! රාලහාමි.......අනේ! රාලහාමි මම........මම..........හො.... හොරෙක් නෙමේ


පොලිස් නිලදරුවාමට ඒවගෙන් වැඩක් නැහැ.ලොකු මහත්තයාගෙන් බේරාගන්නවා. එනවා යන්න.

      
     පසුව පොලිසිය මඟින් උසාවියට ඉදිරිපත් කෙරිණි. නඩු දිනයේදී අර අසරණ කාන්තාව (බිරිඳ) පොඩි දරුවාත් කිහිලි ගහගෙන අඩ නිරුවතින් උසාවියේ පෙනී සිටියේ මුළු ලෝකයම තමන්ගේ පවුලට විරුද්ධව අවි අමෝරාගෙන සිටිනු දකිමින් බියෙන් හා තැති ගැනිමෙනි. පැමිණිල්ලේ කරුණු සලකා බැලු විත්තිකරු අමතා:


විනිසුරුතුමා -   තමාට නිදහසට කරුණු කියන්නට අවස්ථාව


විත්තිකරු  -අනේ හමුදුරුවනේ මම හොරකමක් නොවේ කළේ.....මේ මේ පුංචි දරුවාගේ .......වශයෙන් කී අඳෝනාවෙන් මුළු උසාවිය නිශ්ශබ්දව ගල්ගැසී ගියේය.


ඉතා හොඳින් එයට කන්දුන් විනිසුරුවරයා වරදට මා ළඟ කිසිම සමාවක් නැ. විශේෂයෙන් හොරකමට දියහැකි ඉහළම දඬුවම නියම කරනවා. අයිතිකරුට නොදන්වා කොස් ගෙඩියක් කඩාගෙන ගියාට සැහැල්ලු වැඩ ඇතිව මාස හයක් සිරගෙට යවනවා. (මුළු උසාවිය මවිතයෙන් බලා සිටී) විත්තිකරු හිරෙන් නිදහස්ව එනතුරු මේ දරුවාගේ හා කාන්තාවගේ නඩත්තුව සඳහා මාසයකට රු. දෙදස් පන්සියය බැඟින් මාස හයක් පැමිණිලිකරු විසින් ගෙවිය යුතුයි.තිරණ දුන්නේය.

             
    අනතුරුව මෙතෙක් විස්මයෙන් හා පුදුමයෙන් උසාවියේ පැවති නිහඬකම බිදිමින් උකුළේ සිටි දරුවා බිම තිබු කාන්තාව හමුදුරුවනේ ඔබ වහන්සේ බුදු වේවා යි වැඳ වැටුණාය.


මේ සත්‍ය සිද්ධියකි. විනිශ්චකාරතුමා තාමත් සේවයේ යෙදේ. නම මහානාම තිලකරත්නය. 12 පිටුවේ නඩු තීන්දුවද මෙතුමාගේය. (කොස් ගෙඩිය, පැමිණිලි කරු ,ජේමිස් හා විනිසුරුතුමන් දෙස ඔබගේ සිත යොමු කරන්න.)


හැමදේම දන්නවා වගේ අපි අද එකිනෙකාට අවලාද කිවාට  මොකද අපි තවමත් ගල් යුගයෙන් එපිටට ඇවිත් ඇත්ද? හරිහමන් කෑමක් බිමක් නැතිව එදා වේල පිරිමහා ගන්න වෙහෙසෙන අපේ ඈයෝ ඕනෑ තරම් මේ දීපයේ අදටත් ඇත. ඉපදුණ දවසේ සිට බොහෝ ආදර්ශ පාඨයන් යටතේ හැදි වැඩෙන අපි කොයිතරම් නොහික්මුණු පුද්ගලයන් කොටස්කද යන්න වඟ විටෙක මට සිතේයි.  උගත්කම සැමට එක සේ නොපිහිටන බව සෑබැවකි. තවද ඈතපිටිසර දුඛිත ජිවිත ගත කරන මිනිසුන් තුල පිහිටා තිබෙන මනුෂ්‍යකම නිහතමානීකම තරම් වටිනා උපාධියක් මේ ලෝකයේ කොතනකටවත් ගොස් ලබා ගැනිමට නොහැකිය. එවැනි මිනිසුන් බොහෝමයක් මගේ රාජකාරි ජිවිතයේ මට හමු වි ඇත. ඔවුන්ගෙන් මට වටිනා මනුෂ්‍යකම් ඉගෙන ගැනිමට හැකිවිය. පතපොතේ දැනුම ඔවුන් දැන නොසිටියාට මොකද ඊට වඩා බඩගින්න නිවා ගැනිමට අතපය වෙහෙසන්නේ කොහොමද කියලා නම් හොදහැටි දැන සිටින ලදි.


    මෙම ලිපිය අවසන් කරමින් හිතට නැඟුණු තවත් සිතුවිල්ලකින් මෙම ලිපිය අවසන් කරමි. මේ ලෝකයේ බොහෝ දැ රැදී ඇත්තේ විශ්වාසය මතය .එම නිසා ඒ විශ්වාසය පළුදු වු තැන ඇත්තේ වෛරයක් සහ කළකිරීමකි.
            වචන උගස් කර ලබා ගත් විශ්වාසය කඩ නොකරනු!!!

14 Comments
Tweets
Fb Comments

14 comments:

හැදෙන විඳි පෙන්වන
නුවණ වඩවන සතරින
සරණ දෙලොවට වන
කලණ බස් දෙන කෙනෙකි ගුරුතැන

  1. අර රත්නපුරේ විනිශ්චය කාරය එක්ක බලනකොට මේ එක්කෙනානං තනතුර නියමෙටම කරන කෙනෙක් වගෙයි.

    ReplyDelete
  2. විනිශ්චයකාරවරයෙක්ට හැගීම් එක්ක සෙල්ලං කරන්න බෑ..

    ReplyDelete
  3. සිතන්නට හැකි අයට මෙම ලිය ගොඩක් හොඳයි.

    ReplyDelete
  4. මේක කියවලා පුදුම කම්පනයක් ඇති වුණා.

    ReplyDelete
    Replies
    1. ඔව්.මේ වගේ අපි නොදන්න තවත් බොහෝ අසරණ අහිංසක මිනිසුන් ඇති.

      Delete
  5. ඇත්තටම මෙතන තියෙන්නෙ මනුස්සකමේ අගයයි. මේ මනුස්සකම නැති තැන මිහිපිට අපායක්ම නේද? අපි රුපියල් සතවලට මනුස්සකම බිලි දෙන්නෙ ඇයි. සංවේදී කමක් නැති තැන වෙන්නෙ මොනවද කියල හිතාගන්නවත් බෑ.

    ReplyDelete
  6. ඇත්තටම අන් සතු දෙයක් ගැනිම සොරකමක්. ඒ සොරකටමට කිසි දඬුවම් ලැබුණා. ඊටත්වඩා මේ වැනි නඩු උසාවි නොයා සමථ මණ්ඩලයට ගෙනයන්න පුළුවන් . ඒත් නිතිය නොදැනිම සමාවට කාරණයක් නෙවෙයි.

    ReplyDelete
    Replies
    1. දයානන්ද අයියා කියන එකත් ඇත්ත.අපි නීතිය දැන සිටිය යුතුයි.

      Delete
  7. තාමත් මනුස්සකම් තියෙන මිනිස්සු ඉන්න එකම කොච්චර දෙයක්ද..

    ReplyDelete
    Replies
    1. ඔව් එක්කෙනෙක් හෝ දෙන්නෙක් හරි ඉන්න එකක රටට වැදගත්.

      Delete
Related Posts Plugin for WordPress, Blogger...